نجوى كرم تغضب وتخاطب السياسيين بعد انفجار بيروت: يا اولاد الأفاعي
نشرت الفنانة اللبنانية نجوى كرم تسجيلًا صوتيًا عبر حسابها على “تويتر” بعد انفجار بيروت ووجهته إلى السياسيين.
وقد عبرت نجوى كرم عن غضبها الشديد وخاطبت الزعماء قائلة “كأنو ما صار شي ومبلا صار وكتّر”.
وأضافت “دبحتونا ودبحتو البلد متل كأنو ما صار شي. طفّيتوا أهدافنا وأحلامنا والبكرة تبعنا ومتل كأنو ما صار شي. هجّرتوا ولادنا وأدمغتنا ومتل كأنو ما صار شي، نهبتونا وسرقتونا وفلّستونا متل كأنو ما صار شي”.
وتابعت “وقال شو وبكل وقاحة قالولنا بكرة بتتعوّدوا، يعودكن العمى أقل شي. مش ملككن نحنا ولا محط تجاربكن وحقل لتحقيق أمنياتكن. ولك لازم ثورة تفوت عبيوتكن تتحسسكن بياللي عم نحسه هيدا إذا كان عندكن أساساً فيه إحساس يا أولاد الأفاعي”.
وقالت بغضب” شغّلتوا فينا المستشفيات وأطبا النفس. خليتونا ميتين ونحنا أحياء يا بلا وجدان. ولك وين ريحة الطيون والزعتر ياللي بدّلتوها بريحة جتت ولادنا وأهالينا؟ وبعدكن عم تتقاتلوا عالسلطة ولك روحوا انقبروا فلّو. صاير ومكتّر صاير ومكتّر بس إنو كإنو الدني عم تشتي”.
واختتمت الفنانة اللبنانية التسجيل الصوتي متسائلة “كيف قادرين تستخفوا فينا؟ كيف قادرين تستخفوا بعقولنا وأرواحنا؟ مش عم نفهم كيف. إذا انتو مش فاهمين مصيبة وإذا فاهمين مصيبة أكتر”.
