احمد السقا يوضح سبب مشاركته في موسم رمضان بعد اعلانه الخروج منه

حل الفنان المصري أحمد السقا ضيفاً ضمن برنامج “الراديو بيضحك ليه”، مع الإعلامية المصرية فاطمة مصطفى، وكشف خلال حديثه عن سبب مشاركته في دراما رمضان بمسلسل “حرب” على الرغم من إعلانه سابقاً خروجه من السباق الدرامي الرمضاني.

وقال السقا: “مكنش فعلاً عندي حاجة في الدراما الرمضانية السنة دي، وقبل شهر رمضان بأيام معدودة لقيت الراجل بتاعي محمد حسن مدير أعمالي بيكلّمني وبيقولي عايزك ضروري”.

وأضاف: “في العادي بتاعي لما بيبقى عندي يوم أجازة مش بحب أتكلم في شغل، بروح أتمرّن وأركب خيل ومبعملش حاجة تاني… ولقيته بيقولي عندي مصيبة في البيت ومش هينفع في التليفون. روحتله البيت وقالي كنت قاعد مع فلان وفلان كلّموني عشان هنعمل مسلسل في رمضان وهنبدأ تصوير يوم التلات الجاي، قولتله أنت بتهزّر، قاللي لا.. فطلبت أقعد مع أستاذ أحمد نادر جلال والمؤلف هاني سرحان تاني يوم الصبح على الأقل يحكولي”.

وأردف أحمد السقا بالقول: “وقولت يا واد أنت لو خدت الريسك ده هيبقى حاجة من اتنين يا هتلبس في حيطة ياما هتبقى كنست تاريخك كله ويبقى نقطة ومن أول السطر… وكانت مغامرة تستحق المغامرة… وبعدين وافقت… ولكن قولتلهم مش هنصور التلات هنصور السبت… عشان أكون لحقت أقرأ وأذاكر”.