نجل محمد ثروت يكشف بدء تعافيه : وقفت على رجلي بعد 160 يوم

أعلن الفنان المصري أحمد ثروت، نجل الفنان محمد ثروت، عن بدء تعافيه من إصابته بمتلازمة ميلر فيشر، والتي جعلته غير قادر على الوقوف على قدمه قرابة الـ 160 يوماً.

وشارك أحمد مقطع فيديو عبر حسابه الشخصي في “انستغرام”، ظهر فيه وهو يبكي ومتأثر بعدم استطاعته الوقوف على قدمه، وأرفق المقطع بتعليق جاء فيه: ” الحمد لله كرم من ربنا وبفضل دعواتكم انهاردة بعد 160 يومًا صراع مع متلازمة ميلر فيشر، أول يوم أنجح إني أقف تاني علي رجلي بعد عشرات الأسابيع ومئات المحاولات”.

وأضاف أحمد متحدثاً عنما تعلمه خلال رحلة العلاج: “اتعلمت كتير من اختبار ربنا ليا، اتعلمت الرضا والحمد على كل حال وإن ستر ربنا علينا فوق كل شيء ومدى تحملك بيجي معاه كرمه ليك فالأخر وإنه مش هيخذلك طول ما أنت مسلم أمرك وإن عادي ممكن ابتدي تاني كل حاجة من الأول وإن لسه في أمل طول ما في حياة”.

وتابع ثروت: “ربنا ألهمني في أول الإصابة وده خلاني أوثق الاختبار ده من أول يوم حتى الآن، وده عشان أول ما أقوم إن شاء الله أتمنى أكون سبب في التوعية لمثل هذه الأمراض النادرة وإزاي لو لقدر الله اتصابت أنت بيها أو حد قريب منك تتعامل معاه إزاي لأن جزء كبير من التعافي هو الحالة النفسية للمصاب”.
وواصل: “حابب أقول حاجة من قلبي بجد، الكرم اللي ربنا كرمني بيه ده نور لي حاجات كتيرة، خلاني أقعد مع نفسي أقيمها وعرفني قيمة نعمة هو مديهالي زي أني أدخل الحمام لوحدي أو أعرف آكل لوحدي أو أمشي خطوة أو حتى اتحكم في جسمي واللي معظم الناس ماتعرفوش أني كنت فقدت بصري لأسابيع في عيني اليسري وفقدت القدرة على التحكم فالكلام لاكثر من شهر”.

وأردف أحمد ثروت: “كل يوم كنت بسأل نفسي وأنا في ظروف دي لو ربنا أفتكرني هو أنا قدمت إيه لكل اللي حواليا؟، ووصلت دلوقتي إن بقى عندي هدف أكبر من إني أنجح أو اشتغل لنفسي بس، خلى عندي إحساس بحاجات قيمتها لما دخلت فيها وحسيت بيها زي مثلًا واحد جاله المرض اللي صابني ومش عارف وفاكر إن عنده مرض تاني وتوفى عشان عنصر الوقت لم يسعفه أو مريض تاني عرف التشخيص ومعهوش فلوس العلاج نظرًا لأن العلاج بتاع الأمراض المناعية زي حقن الأجسام المضادة غالية جدًا.. إن شاء الله قريبا جدا هقول عن حاجة شغال عليها هتخفف المعاناة عن أي حد محتاج مساندة أو مساعده ويا رب ربني يقدرني وماشوفش حد يدخل في اختبار زي اللي أنا مريت بيه”.
واختتم: “أخيرا حابب أشكر كل واحد دعالي من قلبه وكل صحابي وأهلي اللي كان حبهم ليا من أسباب إني أقف تاني على رجلي بعد ستر وتوفيق ربنا، ودعواتكم ليا لإتمام الشفاء على خير ويا رب يكون ربنا جعل مني بعد اختباره ده إنسان أفضل”.