ملحن اغنية “كدابة” لـ حسام حبيب يرد على اتهامه بالسرقة

رد الملحن والموزع الموسيقي إسلام رفعت على الاتهامات بسرقة لحن أغنية “كدابة” للفنان المصري حسام حبيب، من المنتج والموزع الموسيقي محمد شفيق والذي اتهم الأخير بالسرقة، من أغنية قدمها مؤخراً فنان صاعد يدعى محمود عز من إنتاج شفيق.

ونشر رفعت مقطع فيديو ورسائل واتساب عبر صفحته الشخصية في “فيسبوك”، وأرفقهم بتعليق جاء فيه: ” أنا مكنتش هرد.. بس مضطر أرد لأن اللي بيحصل ده قلة أدب وتطاول، لسه جايلي تليفون دلوقت من صديق ليا بيقول إني في حد كاتب بوست إني واخد لحن أغنية حسام حبيب من أغنية لمغنٍ أنا أعرفه معرفة شخصية واشتغلت معه بالفعل وعلاقتي به أنه مغنٍ، وأنا ملحن وموزع يعني واضح مين اللي بيسمع من التاني”.

وتابع إسلام رفعت: “أولاً مستحيل مستحيل مستحيل أنا اللي بقول إنه يكون توارد أفكار أو خواطر أو نغمات، أنا مسروق بالمللي وبالهارموني حتى، هو برافو عليه محاولة حلوة منه إنه ينط عليّ بروباجندا حسام حبيب، ويحاول نجيب سيرته، ويمكن تصيب معاه، بس أنا هخليها تصيب معاه إنه يتشهر بأنه غير أمين ومعندوش ضمير نهائي”.

وأضاف: “كل الناس عارفيني كويس وعارفين شخصيتي إني عمري ما أعمل حاجه “بالخسة دي” أو بالسذاجة دي! إني آخد حاجه إبداعية في أكتر حاجة بحبها وهي الموسيقى من حد أو أقتبس جملة من هنا أو من هنا، والحمد لله أعمالي كلها بتتكلم عني، الأغنية دي الشاعر عمرو المصري بعتلي كلامها من شهر مايو 2023 اللي فات تقريباً، وأنا لحنت الكلام وعملت شكل ليها وبعتناها لأكتر من مطرب من ضمنهم حسام، وبالفعل كانت من نصيبه، والأغنية جاهزة من فترة كبيرة جداً ولكن حسام اللي كان بيأخر. ومرفق في البوست فيديو أنا مصوره بيدي من الكمبيوتر بتاعي متوثق فيه تاريخ الأغنية وصوتي في الديمو”.

وتابع: “الموزع شفيق كاتب إن أغنيتهم نازلة يوم 18/1، وحسام حبيب منزل خبر أغنية كدابة من يوم 8/1 تقريباً فهو إزاي يعني وأي حد يقدر يعمل سيرش على جوجل ويتأكد من صحة كلامي”.

واختتم كاتباً: “آخر حاجة عايز أقولها إني معايا كل ما يثبت إن اللحن بتاعي من مستندات، وإني هتخذ كل الإجراءات القانونية مع أي حد جاب سيرتي أو اتكلم عليا بشكل مسيء وحاول ينط وعايز يتشهر”.

https://www.facebook.com/islam.refaat.10/posts/7213430292071579?ref=embed_post