هل انتقدت رنا الحريري قرار الحكومة السورية الجديدة فيما يخص “البوركيني”؟
بعد الضجة الكبيرة حول قرار وزارة السياحة فيما يخص لباس البحر، خرجت الكاتبة السورية رنا الحريري بتدوينة عبر صفحتها الشخصية في “انستغرام”، عبرت من خلاله عن حلمها المنتظر لسوريا الجديدة.
وكتبت رنا الحريري: “هاد مو خطاب سياسي، عم اكتب بس لشارككم حلمي وافكاري عن سوريا، كيف انا بتخيلها (او بتمناها) تصير”.
وأضافت الحريري: “بتمنى تبدأ حملة ضخمة للنظافة، يتنظف كل شارع، كل ساحة، كل حديقة، بكل المدن والمحافظات، وتصدر قوانين صارمة جدا بحق كل مين بيخرب الاماكن العامة او بيرمي الاوساخ، وحملة تانية لترميم البيوت وكل المناطق المدمرة، لتصليح الشوارع وتطوير كل البنية التحتية”.
وتابعت الكاتبة السورية: “بتخيل يصير في اهتمام خاص بالسياحة، لانه دولة متل سوريا، فيها التاريخ وخصوصية العمارة، فيها اجمل الشواطئ، جبال، صحراء، وسهول خضراء، واهم شي شعبها ودود ومضياف، وفيها اطيب اكل بالعالم”.
وأكملت: “لهيك بتوقع لما وزارة السياحة تصدر قوانين ذكية لتشجيع المستثمرين من كل دول العالم وتدعم (السوريين منهم) وقوانين خاصة لتشجيع وجذب السياح، قديه رح يتحسن الاقتصاد وتزيد فرص العمل وتتحسن أحوال البلد والناس”.
واستطردت: “بتمنى يصير في اهتمام كبير بالتعليم، والكوادر التعليمية، وتتطور الأنظمة الدراسية لتتناسب مع عصر الذكاء الصناعي والانفتاح على العالم”.
وختمت رنا: “في سوريا يلي بتمناها كل انسان يعيش وهو حاسس بالأمان، وبيقدر يتصرف بالطريقة يلي بتناسبه، طالما ما فيها إساءة للغير او خدش للحياء العام، لانه في قوانين بتحميه، وبتحمي حريته، باللباس، بالمظهر، وبالرأي، والكل متفق أن الدين، الطائفة، القومية، المعتقدات، الأفكار، كلها أمور خاصة ما حدا بيحقله يتدخل فيها او يفرضها على غيره، والناس بيتقيموا حسب اخلاقهم والطريقة يلي بيختاروا يتصرفوا فيها، مو حسب ديانة او انتماء من يوم ولادتهم انفرضوا عليهم”.
