بعد طفولة صعبة.. تامر حسني يكشف كيف حوّل الفقر إلى نجاح ملهم
وجّه الفنان المصري تامر حسني رسالة مؤثرة إلى جمهوره، دعاهم من خلالها إلى التمسك بالأمل وعدم الاستسلام للصعاب، مستندًا إلى تجربته الشخصية التي عاش خلالها طفولة قاسية مليئة بالفقر والتفكك الأسري، قبل أن يتمكن بالإصرار والإرادة من الوصول إلى النجاح.
تامر حسني شارك عبر حسابه على “إنستغرام” مقطعًا من أغنيته الشهيرة “طول ما أنت مش تمثال”، وكتب معلقًا: “حبايبي اللي بيفكروا حالًا، دي رسالة ليكم.. قضبان سجن أفكارك السلبية هي من صنعك أنت، محدش حابسك والله، أنت اللي حابس نفسك، مجرد ما تبطل تفكر بشكل يائس، هتقع كل القضبان، وهتخرج من سجنك، وهتنجح، وهتحقق كل اللي نفسك فيه وأكتر.”
الفنان تحدث بصراحة عن الصعوبات التي واجهها قائلاً: “أقسم بالله، قبل ما أنجح، ياما كنت بسمع جمل زي: أنت مستحيل تنجح، صوتك مش هيوصل، ما فيكش مواصفات النجم، غير الفقر المادي القارص، والتفكك الأسري من وأنا عندي 7 سنين.. يعني إحباط من كل الجوانب. بس عمري ما يئست، بالعكس كنت بأخد الكلام ده حافز وعناد للوصول.”
وأضاف في رسالته: “قوموا اتحركوا واسعوا.. الحياة لا بتحب ولا هتضحك للمستسلم، ولو مش عاجبك مكانك في الدنيا غيّره، أنت مش تمثال.”
تامر حسني يواصل تقديم محتوى تحفيزي عبر حساباته، حيث نشر أيضًا مقطعًا من فيلم كرتوني يرمز إلى فكرة مواجهة المستحيل بالإيمان بالنفس. وعلّق قائلاً: “كلنا لما بنفكر ناخد خطوة جديدة للنجاح مش بنبقى عارفين هننجح ولا لأ، بس لو حسبناها صح وحضرنا لها صح مع الناس الصح في التوقيت الصح، هيبقى فاضل أهم حاجة وهي إيمانك بالخطوة وحبك وشغفك الخارق ليها.”
وأوضح حسني أن مشهد الطفل الذي يظهر وكأنه يمشي في الهواء يرمز للأحلام المستحيلة التي قد تتحقق بالثقة، وليس بمعناه الحرفي.
واختتم حسني رسالته بالتأكيد على أهمية الحاضر، قائلاً: “ركز في الحاضر عشان ده بس اللي ملكك، وهو ده الوقت اللي لو حبيته هيحبك ويقف معاك.. خد حالًا أحلى قرار ينجحك، محدش هينفعك غير مجهودك وسعيك، ومتبصش وراك أرجوك.. نهاركم كله خير.”
